النهارده هنتكلم عن موضوع منتشر ومشهور جدا خاصة فى الصيف الى احنا فيه ده و بين الأطفال و الكبار خاصة اللى عندهم زيادة فى الوزن
هنتكلم عن حمو النيل أو ال sweat rash 😰
و اتسمى بالإسم ده بسبب إن زمان قبل السد العالى كان بيجى فيضان النيل فى الصيف فى شهر ٧ ، ٨ و معاه حر و رطوبة عالية فكان يجيلهم و يسببلهم حرقان و هرش شديد عشان كده سموه حمو يعنى حرقان و النيل عشان كان بيجى فى وقت حدوث الفيضان 😉
طيب أولا كده عايزين نعرف ايه هو حمو النيل ده 🤔 ؟!
حمو النيل ده بيكون عبارة عن طفح جلدى بيجى فى الجسم خاصة فى الرقبة و الضهر و الصدر و الدراعين و بيكون على هيئة حبوب حمرة ليها رؤوس بيضة صغيرة وبيكون معاها احمرار و هرش و إلتهابات
طيب و ده بيحصل بسبب ايه 🤔 ؟!
- بيحصل لما الجو بيكون حر أوى و فيه رطوبة عالية فتلاقى جسمك دايما عرقان و بسبب إن الرطوبة عالية فى الجو فالعرق بالأملاح اللى فيه مش بيتبخر و بيفضل على جسمك بالتالى هيسد المسام و الغدد العرقية اللى هى ال sweet glands بالتالى تظهر الحبوب الحمرة اللى بيصاحبها رؤوس بيضة بسبب تجمع الصديد فيها بسبب وجود بكتريا
- كمان بردو بيحصل بسبب استخدام الملابس الصناعية زى البوليستر و الملابس الضيقة
طيب ازاى اقدر أعالجه بقى و ايه النصايح المهمة اللى لازم يمشى عليها 🤔 ؟!
١) أول و أهم نصيحة بلاش تهرش كتير فى الأماكن اللى فيها حمو النيل عشان ده هيهيج جلدك أكتر و أكتر و يسببلك إلتهابات شديدة و لو فرضا مش قادر خلاص و عايز تهرش اهرش ببطن إيدك مش بضوافرك
٢) اقعد دايما فى أماكن فيها مراوح أو تكييف و بلاش تنزل فى الشمس كتير
٣) استحمى بمية ساقعة يوميا و ابعد عن الليفة الخشنة و يا سلام لو تستخدم صابون جليسرين يبقى كده فل أوى و متنساش تتنشف كويس
٤) إلبس ملابس قطن و بلاش اللبس الضيق
٥) استخدم لوسيون ملطف (soothing) و مضاد للحكة (antipruritic) زى Calamyl-D , bringo , dermo calm , hiderm , hipanthen lotions
و دول بنرجهم كويس و بعدين ندهن بيهم الجسم مرتين أو تلاته يوميا
٦) كمان ممكن تاخد أقراص أو شراب للحساسية (antihistamines) زى zyrtec , claritine , telfast
و جرعتهم مرة بليل يوميا
٧) ممكن بردو تاخد كريمات ملطفة (soothing) و مرطبة (moisturizing) للجلد عشان تهدى الهرش و الإحمرار زى panthenol , bepanthen , carbamide , care by care
و جرعتهم دهان مرتين يوميا
٨) فى حالة بقى وجود رؤوس بيضة نتيجة تجمع الصديد (pus) اللى بيبقي بسبب bacterial infection ساعتها هتحتاج تاخد antibiotic عشان تمنع نمو البكتريا دى زى كريم fucidin , fusi و ممكن كمان تاخد كريم فيه مضاد حيوى معاه كورتيزون عشان يقلل الإلتهابات زى fucicort , fusi-zon
و جرعتهم هتكون دهان مرتين يوميا
معلومة عايزك تاخد بالك منها ✋
بلاش تستخدم بودرة التلك فى علاج حمو النيل لإنها ممكن تقفل المسام و قنوات الغدد العرقية بالتالى هتزود المشاكل أكتر و أكتر
 |
إرسال تعليق